政情：離島遊人多 區議員斥影響居民
中港未恢復通關，旅遊氣泡亦不知何時重啟，香港本地遊成為喜歡遊山玩水嘅市民，唯一嘅選擇，因此每逢假日，著名觀光熱點同郊遊勝地都人頭湧湧，為幾陷於冰封嘅市道注入些許暖流。之不過，有離島區議員就嫌大量遊客去長洲旅遊，極之影響當地居民嘅日常生活，仲話政府逼市民去離島同郊外喎。
初一到初六 慢船屢冇位
離島長洲選區區議員梁國豪日前就喺社交平台大吐苦水，話長洲來往中環嘅渡輪，係島上居民主要嘅對外交通工具，然而由年初一到年初六，都有慢船滿座、提早開出嘅情況，對長洲居民嘅出入構成影響。梁就呼籲市民考慮去唔同地方旅遊，唔好限死喺離島、西貢等。
對於有聲音話市民去長洲本地遊可以帶旺經濟，梁國豪唔同意講法，佢話根據「非正式統計」，目前長洲居民總共有大約3萬人，但做生意嘅唔超過1,000人，話只有商家受惠，大部分長洲街坊都冇份受惠喎。不過梁呼籲市民改去其他地方，似乎係將問題移去第二處啫。其他涉及本地遊嘅區域如東涌、大澳、坪洲等地嘅居民都可能面對類似嘅情況，難道得長洲先有呢個問題咩？