中環出更：一人盆菜派長者 張綺媚：麻雀雖小 五臟俱全
每逢過年過節或喜慶日子，盆菜都係一種好受歡迎嘅食物，因為造就機會同枱食飯，寓意團團圓圓，特別適合喜歡熱鬧嘅老友記。但礙於疫情肆虐，大家都盡量避免聚集，以致好多團體都唔敢舉辦盆菜宴。有慈善機構留意到呢個情況，特意為長者準備一人盆菜，早前更去到屋邨派發，猶如舉行另類嘅「百家宴」。
慈善機構「愛拼人生」主席張綺媚（Emily）話疫情之下，經常派發內有防疫物資嘅福袋，不過派盆菜就係第一次喇！Emily透露自己好鍾意食盆菜，特別係當中嘅燒肉同冬菇，所以希望長者可以感受同樣嘅溫暖同快樂。雖則係一人盆菜，但麻雀雖小、五臟俱全，入面有齊8樣餸菜，包括雞、蝦、蘿蔔等，當然唔少得Emily最鍾意嘅燒肉同冬菇喇！
吳藹雯：老人疫下冇得落街飲茶
協作慈善機構兩地一心「孝愛共融」籌委會主席吳偉樂（Ray）指疫情反覆，難免有部分義工心存顧慮而暫停參與服務，但同時有義工「餓咗好耐」，一見到有活動就踴躍報名。Ray話今次總共派發近一萬份盆菜，以往同類活動會動員大約一千名義工，但受疫情影響，今次只可以請300位義工幫手，所以大家就要辛苦啲，多次來回運送物資喇。而為咗配合社交限制，義工只可以兩人一組咁上門探訪，同埋只可以喺門外簡單傾談咋。
義工團「AP 111」代表吳藹雯（Mimi）話疫情之下做義工係有一定困難，因好多機構唔容許上門探訪。至於今次派發一人盆菜都有一定嘅難度，事關工場喺農曆新年比較忙碌，價錢、物流、人手都面對挑戰，不過好開心見到大家出心出力。Mimi提到好多長者都好鍾意落街飲茶、散步，依家要長期困喺屋企真係好悶。仲有好多長者嘅屋企人身處外地，又唔識用視像通話，成日都孤零零，所以Mimi都樂於陪長者傾偈，始終佢哋最需要面對面嘅接觸啊。卓妮