政情：公民講場：一入官場嘴臉大變 何啟明背棄打工仔

儘管經濟不景，但加薪仍然係每個打工仔嘅心願，畢竟通脹猛於虎呀！然而政府早前決定維持現行法定最低工資水平，就算今年稍後本港經濟復甦，但礙於最低工資係兩年一檢，基層打工仔微薄嘅薪水都會被通脹所蠶食，於是有議員向立法會提交私人條例草案，要求將有關檢討周期縮短至每年一次，然而勞工及福利局副局長何啟明就話，若果百業興旺，僱主會因勞動力不足而調升薪金喎！換言之，即係話無意縮短檢討周期囉。想當日何啟明未加入政府，口口聲聲為勞工界爭取權益，依家貴為問責官員，就對基層打工仔嘅訴求闊佬懶理，莫非佢坐上官位，腦袋亦隨之轉變？