政府話會多管齊下吸引年輕人加入政府，公務員事務局局長聶德權交代喺過去5年政府招聘嘅政務主任當中，在學期間曾參與「政務職系實習計劃」佔總數約六分之一，比例唔算少，又話舊年有1.4萬人申請29個政務主任職位，形容競爭激烈。睇嚟只係佢自我感覺良好，事關有議員直指數字太低，又質疑計劃欠吸引力，仲話當局冇評估參加者實習時嘅表現，冇善用「揀蟀」嘅機會添！簡直係一盆冷水照頭淋，擺明係叫聶德權咪認叻喇！
