政情：行會放假 二人限聚暫未放寬
政府放寬部分社交距離措施，包括容許食肆4人一枱。但禁聚令就要由行政會議決定放寬，惟有繼續維持二人上限，被各界批評毫無科學根據同邏輯可言。議員田北辰（田二少）都忍唔住批評政府上下唔係一條心打仗，連召開緊急會議都唔肯。
議員斥打仗上下唔一心
政府容許今日起恢復晚市堂食，更加可以放寬至4人一枱。之不過公眾地方嘅禁聚令法例，要經行會拍板修改。但行會仍然放緊農曆新年假期，到下周二先「開爐」，禁聚令迫不得已仲要維持二人限制喎。田二少尋日喺社交網站發文，提及成日都話打仗係要政府團隊上下一條心，但今次竟然因為行會放假，令到禁聚令無法同步放寬，形容「老闆」Call個15分鐘嘅緊急會議都唔肯，有份造成一盤散沙嘅局面，就算有「有心人」都好難做到嘢喇!
禁聚令同限桌令唔同步都唔係第一次，喺上年10月，政府放寬食肆每枱人數至6人，但禁聚令就維持4人。政府始終未吸取教訓、重蹈覆轍，睇嚟市民4個人食完飯之後，惟有前後腳離開喇！