政情：公民講場：唔掃碼冇得幫襯 業界轟政府趕客

政府尋日話，若果呢幾日嘅疫情冇惡化的話，會考慮由大年初七起放寬社交距離限制，以及容許部分行業恢復有限度運作，不過條件之一，係顧客進入有關場所前，必須使用「安心出行」應用程式記錄行蹤，又或者登記姓名同電話等個人資料，以便聯絡跟進咁話。消息一出，相關嘅業界人士無不鬧爆，事關佢哋唔係執法人員，既無法強制顧客掃描「安心出行」二維碼，亦無權力要求人家留下個人資料。食物及衞生局局長陳肇始喺構思政策之前，究竟有冇諗過可行性呢？列出業界難以執行嘅條件，做咩咁大整蠱呀！