立法會《〈2020年保險業（修訂）條例〉（生效日期）公告》及《保險業（特定目的業務）規則》小組委員會尋日朝早召開首次會議，議員周浩鼎詢問政府，如何確保資本巿場不會向小投資者出售「巨災債券」，以及當有人投訴銷售行為違規時，由邊一個部門負責監管同執法。政府代表就話，會由保險業監理處負責。
財經事務及庫務局首席助理秘書長（財經事務）保險及退休計劃曾鳳怡表示，局方會透過３方面處理問題，列明特定6個類別嘅投資者先至可以購買，當中包括銀行機構、認可交易所等，不能包括強積金基金同職業退休計劃，亦會額外保障投資者同業界發展取得適當平衡，上限為25萬美元。曾又話，保險業監理處會負責審批，並冇削弱證券及期貨事務監察委員會喺規管架構下要進行嘅工作，銷售買賣繼續受證監會監管。
保監處副總監（政策及發展）陳慎雄就話，執法工作必定由保監處負責，佢哋會同證監會協調，以檢視會否有違規行為出現。另外，進出口界議員黃定光喺冇競爭情況下自動當選小組委員會主席。黃話會喺本月24日嘅立法會大會上代表小組委員會，動議延展法例審議日期至下月17日。