政情：扮牛童唱賀年歌 陳恒鑌被嘲似耕田佬
辛丑牛年將至，有政黨透過社交平台發布短片同市民拜個早年，片中議員陳恒鑌（Ben）粉墨登場，扮成通勝春牛圖裏面嘅牛童向大家拜年。但唔知係咪效果唔夠理想，反而望落有啲似耕田佬喎。
似演繹「經典」卡拉OK
條片一開始，就見到身穿牛童衫同孭住頂草帽嘅阿Ben，背對鏡頭然後慢慢轉身，笑騎騎咁望住鏡頭，開始揮動佢手上嘅枯枝同埋做出拜年嘅手勢，跟住一眾政界人士陸續出場並配上懷舊拜年歌曲。唱完歌之後，Ben又再次身穿牛童衫出嚟跳舞添。
但仔細一睇，短片開場就好似成本極低嘅電影，背景啲牛明顯唔係實景。而Ben衣着似耕田佬都不在話下，無啦啦出現喺牛群中，又無啦啦唱懷舊賀年歌，仲扭身扭勢跳舞喎，望落就有啲滑稽喇！
網民睇完都紛紛留言，有人話Ben個造型好掂，亦有人問係咪唱緊經典卡拉OK喎。但其實「經典」同「老土」都係一線之差，把握得好唔好就要睇議員演繹嘅功力喇。