中環出更：露宿者年輕化 麥美娟斥羅致光離地
本港失業率持續創新高，打工仔都叫苦連天。議員麥美娟（Alice）鬧爆一眾高官離地，要同佢哋解釋基層生活苦況，每次都要大費唇舌，就嚟忍唔住捉官員落區感受一下o架啦。
高官難理解水費幾貴
年關難過，Alice話每次落區探訪都令佢好心酸，話有次見到個打扮好似議員陸頌雄嘅露宿者，原本只係以為佢係同場義工，直言露宿者年輕化嘅現象令佢好詫異。Alice早前提出禁止劏房業主濫收水費嘅私人條例草案，獲得政府批准。佢話一眾官員離地，唔覺得劏房戶每次可能要交成500蚊水費係幾咁離譜，非要以物價嚟做類比，對方先略有所悟。Alice慨嘆話要說服班官員真係要費好多力氣囉。
Alice尤其開名鬧勞工及福利局局長羅致光，話佢自以為夠晒聰明，點知係夠晒離地就真。而同屬工聯會嘅勞工顧問委員會勞方代表鄧家彪早前邀請羅致光出席大辯論，討論失業援助金嘅利弊。Alice透露已經傾緊日子同形式，不過佢就唔會落場，話驚自己一開口就鬧爆羅致光啊！
卓妮