中環出更：為避人流 容海恩預早去車公廟求籤
送舊迎新，辛丑牛年眨吓眼就到。農曆新年前後，一眾政界人士都安排咗好多節目。議員容海恩（Eunice）就提早去車公廟還神同埋求籤喇，一共求咗三支籤，其中為香港求得中籤，解籤師傅就解讀為，有啲嘢做咗但係嘥時間、嘥心機喎。
臨近過年，Eunice着到成身紅噹噹，但同時避開人潮，預早去車公廟求籤，仲喺社交平台發文，祝願來年大家都能事事順利、新嘅一年勝舊年。而佢為香港求嘅車公靈籤第85籤嘅籤文係「七弦揮操響叮噹，錯向愚夫襯鄙腔；琴音原不入牛耳，褐衣豈對綠衣郎。」佢對籤文琴音不入牛耳有啲見解，理解為有人鍾意聽、有人唔鍾意聽，但就話香港金融地位一直名列前茅，希望可以繼續努力；同時希望疫情過去之後，香港可以更好。對於家宅同自身嘅籤文，佢就話唔講喇，以免大家見笑咁話。
為食區議員學整傳統食品
年三十晚就梗係食團年飯啦。前議員陳凱欣（阿欣）就趁機搵大廚偷師喇，話今年受疫情影響，儘管唔出街光顧食肆，但其實自己都可以炮製全家都讚賞嘅團年飯。阿欣喺Facebook上載影片，影片中見佢幫大廚做助手，但都有板有眼，最後煮出多款賣相甚佳嘅餸菜。佢話團年飯食咩嘢都唔緊要，最緊要一家人齊齊整整，預祝市民新一年壯健如牛呀。
另一位為食嘅觀塘區議員顏汶羽（Frankie），就去學整傳統食品喎，究竟係乜嘢呢？Frankie喺社交平台上載影片，佢同幾位黨友原來係去沙頭角嘅農莊，搵師傅學整蘿蔔糕、圍村客家菜豬肉缽同埋芋頭扣肉喎。之不過，大部分嘅人士都雞手鴨腳，分唔清各種材料之餘，時不時都互相提醒唔好炒燶呀。不過好彩，最後整出嚟嘅食品都似模似樣，各人仲一齊品嘗番自己嘅手藝添。
卓妮