政情：公民講場：懶理地盤傳播鏈 熱衷封區太片面

繼跳舞群組後，地盤群組係第4波疫情嘅另一條傳播鏈，譬如機場三跑地盤上個月已經出現染疫個案，但係政府當局連日來都好熱衷到民居住宅搞「封區」，反而就當作地盤好似冇事發生咁。港大感染及傳染病中心總監何栢良都話政府嘅做法好奇怪，既唔去封地盤、又未聞當局派員實地了解情況。出現地盤群組唔立即採取果斷行動，即使後來強制工人每個禮拜都做檢測，阻截病毒傳播亦只會事倍功半。