政情：立會升降機試用「無觸按鈕」
喺新冠肺炎疫情下，公眾嘅衞生意識亦有提高，乘搭升降機時都會避免手指直接接觸按鈕。立法會為咗減低病毒傳播風險，近日就喺大樓近公眾入口嘅其中一部升降機內，安裝「無觸按鈕」按鈕面板，使用者唔使觸碰按鈕，只要將手指靠近按鈕，系統就會感應到使用者需要按下嘅層數，並喺今日開始試用。
視乎成效再擴展
立法會秘書處回覆查詢時話，大樓尋日起試用嘅裝置係由香港生產力促進局研發，而相關裝置及安裝費用就由秘書處負責，不過就冇透露涉及幾多開支喇。秘書處仲話將視乎測試成效，再考慮係咪將裝置擴展至大樓其他升降機。
本報記者尋日走去實測裝置，升降機內兩邊嘅按鈕都分別安裝咗一個感應器。使用者需要伸出手指先會啟動到裝置，如果伸出手掌的話，就唔會觸動到感應器。
唔止升降機內，原來升降機外嘅按鈕都安裝咗自動感應按鈕，不過依家暫時得地下升降機門外有安裝。使用者喺其他樓層，就仍然要用手指撳掣喇！