政情：港台劣迹難忍 立會提早質問
年花十億元公帑嘅香港電台（港台）劣迹斑斑，商務及經濟發展局喺舊年成立檢討港台管治及管理專責小組處理，而個檢討報告已進入尾聲。但有唔少議員批評，喺等待討論涉及港台嘅投訴同時，港台涉事嘅節目就繼續播出，報道新聞嘅質素問題依然存在，雖然檢討報告仲未出爐，但已經急不及待要提前喺下個月嘅立法會資訊科技及廣播事務委員會上討論。
商務及經濟發展局常任秘書長梁卓文，尋日喺資訊科技及廣播事務委員會上指出，有關港台嘅檢討報告已經進入定稿階段，建議等有跟進報告後再喺委員會上討論，又話明白議員對港台問題嘅重視，會盡量配合安排，不過都係未有確實時間。
部分內容涉辱警 僅譴責了事
議員葛珮帆（EQ）就話，之前有去信當局要求盡快另開會議討論港台嘅問題，不過會議都未開得成，又有另一則投訴，就係關於港台電視節目《鏗鏘集》喺舊年12月14日播出有關屯門青山灣入境事務中心嘅節目，有紀律部隊工會批評內容涉失實同埋偏頗，令有關部門好憤怒。
EQ仲提到，早前通訊事務管理局已經裁定港台另一節目《頭條新聞》，有部分內容涉污衊和侮辱警務人員，認為作為總編輯嘅廣播處處長梁家榮，應該需要負責，唔係淨係譴責、警告就了事。
何君堯：新聞報道未受監察
議員黃定光就提及港台近日惹來爭議嘅報道，質疑港台作為新聞機構，專業水平是否不足，亦不滿港台未有為記者報道出錯而作出道歉，反而發公開信聲稱被抹黑，直斥港台依家連意見都唔肯接受，認為有必要盡快就港台嘅運作做檢討，甚至係宜快不宜慢！
事務委員會主席何君堯就話，本身係打算喺今年4月份討論港台嘅事，不過期間就出現更多有關港台嘅投訴，認為喺報道新聞時，編輯未能彰顯到監察作用，惹起社會有廣泛回響，質疑係咪新聞從業員應有嘅表現，所以認為有必要提前喺下個月討論。不過港台積習難除，係咪可以解決到啲問題就要拭目以待喇。