中環出更：最緊要豐衣足食 鄭美恩：女兒出閣白米做嫁妝
白米不但係中國人嘅主要食糧，更是財富嘅象徵，因此廚房個米缸都要貼上寫住「常滿」嘅紅紙，以寓意豐衣足食。金紫荊女企業家協會常務副主席鄭美恩（Lisa）亦都好重視白米嘅價值，佢打趣話將來女兒出閣，都會用白米嚟做嫁妝。
Lisa話白米係中國飲食文化重要嘅一環，鑑於農曆新年將至，佢決定以私人公司名義將一批白米捐贈畀鄰舍輔導會，好讓受惠家庭開開心心食餐團年飯。由於同枱食飯有助維繫家庭感情，所以女兒一旦覓得如意郎君，嫁妝裏面又點可以缺少白米呢？至於近來白米嘅來價，比以前係貴咗少少，Lisa指出蟲患影響收成係原因之一，加上疫情之下運輸受阻、部分產米國家因考慮國內需求而暫停白米輸出，來貨少咗自然推高售價，但幸好今次捐出嘅白米係來自柬埔寨，而當地未有實施管制出口，所以影響唔大。經營米業嘅Lisa話會將白米製成禮盒以打破長久以來嘅包裝設計，市民購買之後既可自用，又可當作禮物送畀親朋戚友。
嚴元浩：籌集物資要與時並進
接受今次白米捐贈嘅鄰舍輔導會主席嚴元浩，指隨住時代嘅變遷，社會面對嘅問題亦各異，譬如早年嘅徙置區治安同衞生問題都廣受公眾注目，近年就係少數族裔融入社會、以及低收入家庭等問題，而志願機構為基層巿民籌集物資，方法亦要與時並進，一定要貼地先可以令基層受到必要同及時嘅濟助。
至於籌款委員會主席王英明，每隔三個月就前往唔同嘅地區服務中心，聽取職員工作上所遇到嘅困難，亦會探訪受助家庭，了解到佢哋真正需要從而改進服務、建立互信。王英明話每當有善心人捐贈物資，必定會同職員落手落腳交到受助者手上，絕對唔會辜負捐贈者嘅心意。
卓妮