政情：拍片學整蝦醬 余漢坤青筋暴現
講起大澳，相信一定會諗起蝦醬、蝦膏等海味。其實蝦醬同蝦膏係兩樣唔同嘅嘢，做法都唔同，就連身為大澳原居民嘅離島區議會主席余漢坤都唔知，喺學整蝦醬同蝦膏時先知，而佢學整時仲搞到青筋都出埋添！
攪勻時似扒龍船
余漢坤最近拍片介紹蝦膏同蝦醬，仲落手落腳整埋一份。製作蝦醬時要先用木棍攪勻，因為啲水分沉喺底，所以要先攪勻，喺曬嘅時候先會均勻啲。睇落好似好容易咁，但余漢坤攪勻啲蝦醬時就似乎有啲吃力，連青筋都出現埋，佢就話其實一啲都唔容易，攪勻時覺得有啲阻力，仲形容好似「扒龍船」咁。
攪完啲蝦醬後就要拎去曬太陽，先倒兩殼蝦醬落窩籃，再用個「殼」底以打圓圈方式鋪平，依個步驟仲叫做「開蝦」，要由朝曬到晚。經歷過攪蝦醬後，余漢坤今次就話知道一啲都唔簡單，睇落容易。之後就到佢落手落腳製作，雖然佢話自己整出嚟好似好肉酸咁，但睇落都似模似樣，仲整多咗幾個添！最後佢仲學埋整「反蝦」，將蝦醬再攪勻同鋪平。到底佢嘅表現如何？老闆就話佢合格，有70分，睇嚟佢要再多多練習喇！