政情：冇得做議員 葉建源搬竇寫揮春
雖然受到疫情影響，但臨近農曆新年，仍然有唔少人去辦年貨，亦有唔少區議員落區寫揮春。教育界前議員葉建源過往幾年都喺立法會擺檔寫揮春，但冇做議員之後，佢就轉移陣地，喺番自己「地頭」寫喇！
返回教協擺檔
以往葉建源喺立法會內擺檔寫揮春時，吸引唔少議員圍觀之餘，不論係民主派定建制派，都獲得葉親筆寫嘅揮春。上年民主派議員決定總辭，齊齊離開立法會，葉建源嘅「揮春攤檔」都要搬竇，佢身兼教協副會長，日前就喺教協擺檔寫。雖然疫情反覆，亦都有唔少捧場客。
葉建源以前擺檔都寫番幾張畀啲議員，今年雖然冇得再喺立法會擺檔，但同屬專業議政嘅會計界前議員梁繼昌都有去捧場，葉建源仲以梁嘅名字，寫咗「繼往開來、昌盛繁榮」，兩人之後仲喺Facebook上互相多謝對方添！