政情：舊樓執正消防設備 政府太遲兼離地

舊樓嘅問題多多，而政府日前終於建議修例加強舊式樓宇消防安全，政府期望今年下半年展開公眾諮詢，制訂合適機制同修改法例。Tony批評政府做得太遲喇，事關唔少舊樓嘅結構根本無可能符合政府要求嘅消防條件。Tony形容班舊樓嘅業主就好似參加咗場一係100分，一係就零分嘅考試，符合唔到政府嘅要求就難以進行改善工程，令到一班業主無動力改善消防安全囉。

渠管更換太慢

Tony認為唔單止可以進行消防安全改善工程，仲可以設定一啲替代方案，例如一啲舊樓整唔到持久防火兩小時嘅消防門嘅話，防火30分鐘嘅消防門又得唔得呢？又例如若舊樓嘅條件整唔到消防花灑，咁可唔可以增加滅火筒嘅數量嚟幫補吓呢？

其實講得白啲，就係當局嘅處事方式太理論化，唔夠貼地同靈活。Tony話正如屋宇署承諾會為兩萬幢，樓齡超過30年嘅私樓檢查外牆渠管，但根本人手唔夠，如果再唔檢討工作進度同表現，一定冇可能喺3年嘅限期內完成工作。佢建議政府可以容許喉管採用易清洗同防菌物料，咁咪可以既快捷又方便咁幫舊式樓宇改善衞生。Tony指政府有時就係太追求完美主義，實行政策時無諗到現實中樓宇結構實唔實行到，應該要靈活啲、有彈性啲囉！唔知署長余德祥聽唔聽得入耳呢？

須軟硬件配合

Tony又話香港正面對雙老化問題，不但樓齡高，而且人口老化，要處理這兩個問題，無論軟件和硬件都要互相配合。佢建議政府可設立樓宇維修保養基金，先注資100億元，再喺每宗物業交易徵收費用，配對式資助和鼓勵私人住宅業主維修，主動幫三無大廈維修公共地方，加快強制驗樓，提高罰則，多管齊下。另外，喺大廈嘅建築同設施上要考慮長幼共融嘅設計，例如增加無障礙設施，令長者住得更舒適，打造令人身心健康嘅城市。