中環出更：空姐轉教瑜伽 朱凱薇肯挑戰唔怕輸
疫情下各行各業大受打擊，失業率更創16年來新高。紫荊青年商會推出「『疫』轉人生工作計劃」，向受疫情影響嘅女性提供援助。其中計劃嘉賓，本身從事航空業已有10年嘅朱凱薇（May）上年2月被裁員，佢曾經申請40多份工作職位但未能成功，雖然難免驚惶失措，但May反而進修瑜伽教練牌照，更自己開設瑜伽中心。疫市創業咁大膽？May就話創業最多咪輸晒啲積蓄，但人一出世都係無錢（口架）啦，正所謂「生來無一物」，就算最後失敗，至少都叫有努力過啊。
May坦言每個人都「鍾意行平路」，追求安穩，佢自己都唔例外；但佢認為每一次作出挑戰後，即使未必成功，都可以學到唔少嘅知識同經驗，人生面對嘅每一個難題都係功課，完成功課後會發現自己嘅能耐同潛能，日後就會更加勇敢面對難題喇。
May話當初決定創業，係因為覺得就算失敗都係輸晒10年嚟工作嘅啲積蓄，頂多咪去番做打工仔，有手有腳總能生存嘅。加上佢認為生來無錢，離世時亦都唔會帶得走啲錢，咁不如試一試啦，形容自己嘅做人態度係安穩中求精彩。
賴嘉敏：頹廢過後仍須努力
唔單止工作失意，人生亦有唔少機會面對難題。紫荊青年商會會長賴嘉敏（Susan）就話中學時曾經成績唔好，同自己預期有好大出入，令到佢當時選科以至日後升學嘅安排都有好大影響，Susan笑言自己唔鍾意計劃被打亂，但頹廢過後都要繼續努力，佢相信即使上天對你關上一扇門，一定會幫你開番另一扇窗嘅。聽落好樂觀，但原來Susan話自己係個悲觀嘅人嚟（口架）。佢會對事情諗法負面，但其實亦有好處，佢計劃時會預備最差嘅結果，思考同埋安排都會非常周詳。不過，Susan話佢對人就比較樂觀，因為相信大家都唔想見到佢苦口苦面o架嘛，所以更加唔可以放棄，要發放多啲正能量。
疫情下好多人心情都唔好，樹洞香港創辦人陳健欣研究心理學多年，佢話好多人因為疫情對社會產生無力感，但應該改變焦點，將精力投放係自身可控制嘅事上，而唔係淨係關心無能為力嘅事。佢平時會叫求助人思考5年後自己嘅生活，幫求助人尋回對未來嘅希望。佢話希望5年後可以提供讓香港人信賴嘅心理服務，又希望可以向社會發放多啲勇氣同埋堅持等心理信念，將心理學融入企業培訓，幫企業設立更好嘅目標。
卓妮