政情：禁堂食打沉餐飲業 陳健波促放寬至4人一枱
政府因應抗疫而實施禁聚令，有關措施雖長期執行但疫情依然反覆，議員陳健波（波哥）質疑措施成效，又認為政府應該盡快恢復晚市堂食，相信只要限制2至4人一枱並唔會造成太大嘅傳播風險，反而嚴厲打擊違反隔離令嘅人士先至係上策。
波哥最近拍片吐苦水，話政府晚市禁堂食嘅安排備受質疑，對餐飲業造成沉重打擊，連帶相關行業，包括食材供應、運輸、清潔等同樣受到嚴重影響。唔單止對市民生活構成不便，仲導致更多人失業添啊。
指應先對付違隔離令者
有見及此，波哥促請政府盡快恢復晚市堂食，相信如果只係限2至4人一枱，大部分都係同家人或者親密朋友食飯，並唔會造成太大嘅額外傳播風險。波哥又認為，反而政府應該更嚴厲打擊違反隔離令嘅人士，因為違規嘅市民同埋食肆，先係令疫情無法控制嘅主要原因啊。波哥已經向食物及衞生局局長陳肇始反映，希望政府聆聽民意，盡快推行安排喇。