政情：顏汶羽斥勞福局搞職津對錯焦
因應唔同嘅客路，就有唔同形式嘅食肆，譬如茶餐廳就係以基層市民為服務對象。觀塘區議員顏汶羽（Frankie）日前幫襯茶餐廳，佢歎杯熱奶茶、食個菠蘿包之後就有感而發，指羅致光身為勞工及福利局局長，竟然搞唔清「在職」同「失業」嘅概念，質疑佢為咗敷衍班失業人士，求其搵樣嘢做就當交代。
無視失業者困境
Frankie喺社交平台發文話，依家搵食艱難、經濟環境差，唔少市民都要節衣縮食，更有部分市民要面對失業嘅困境。佢就鬧爆羅致光成日諗住優化在職津貼，但若果在職津貼能夠幫到失業人士的話，咁就唔係在職津貼啦！明明在職津貼嘅目標對象都唔係失業人士，反問羅係咪唔明白「在職」同「失業」嘅分別呢？
政府現時勒令食肆喺晚上6點後禁止堂食，Frankie就話唔少打工仔為咗慳錢同埋禁堂食所限，一日三餐都要變成一日兩餐，不過點都唔夠失業人士可憐。佢話政府應該立即成立短期嘅失業援助金，幫失業人士走出困境。但實際上，佢話勞福局冷血無情，政策又對錯焦，希望羅致光可以多啲同基層市民接觸，唔好做事咁荒謬呀！