政情：何君堯狠批 創科園大花筒

謝偉銓嘲「講大個數就唔超支」

立法會財務委員會尋日審議注資香港科技園嘅項目，其中逾172億，用以支持位於落馬洲河套地區嘅港深創新及科技園第一批次發展，另外有逾8億用嚟支持公司嘅早期營運開支，總共涉及約181億。議員何君堯直斥香港政府做嘢向來好鬼貴，成日「賴地硬」，話土地荒蕪要錢「開荒」，永遠覺得所執行嘅工程係最艱難，需要一大筆錢。何君堯又批評費用唔夠「用得其所」、地未盡其用、時間拖太慢，促請政府要盡快完工啊。

創新及科技局局長薛永恒回應話，有信心項目可以按照財政預算，如期完成。佢又話，創科園落成後，將會為香港嘅本地生產總值貢獻520億，絕對值得投資啊。建築、測量、都市規劃及園境界議員謝偉銓（Tony）同樣唔收貨，直言促進創科發展都唔代表可以亂使錢，創科園第一批次發展用成172億興建8座樓宇，即係以大約20億興建一座樓宇，係難以令人接受。又話薛有信心確保項目唔會超支「好簡單」，只要「講大個數就永遠唔會超支」。

答案唔到肉 被促補書面回應

Tony多次發言追擊，但薛永恒始終未妥善回覆。財委會主席陳健波（波哥）都忍唔住幫口，話議會唔再係以前咁吵吵鬧鬧，希望利用機會監察政府，而官員都要專業、到肉咁配合，唔好當議員嘅批評同質詢係害你。波哥直指希望薛尊重Tony提出嘅問題，之後補番書面回應，甚至可以約Tony見面，當免費諮詢，幫手減少工程費用。

至於議員葉劉淑儀就質疑本港大學較少培訓創科人才，話大學生比較鍾意修讀專科。薛回應話有3萬幾名大學本科生就讀STEM相關課程，比以往大幅上升咁話喇喎。項目最終以27票贊成通過，但議員鄭松泰投反對票；而Tony就投棄權票，睇嚟薛永恒真係要拿拿臨約佢見面，氹番佢喇。