中環出更：開拓內地市場 方舜文教親身上陣做網紅
國際貿易情況持續緊張，對於做慣外貿嘅本地中小企及工商界人士而言，都覺得經營環境非常嚴峻。香港貿易發展局總裁方舜文（Margaret），就建議本地廠商不妨嘗試開拓內地巿場，因為潛力巨大啊！不過佢又提到，就算產品打入內銷巿場，一旦涉及線上推廣的話，幾乎都離唔開透過KOL或者網紅嚟做代言。而廠商與其傷腦筋去物色網紅，倒不如自己親身上陣咁話。
Margaret日前接受中華廠商聯合會（廠商會）行政總裁楊立門嘅訪問。期間佢講到關於網紅，好多中小企老闆嘅反應係「嘩！到底係乜嘢嚟o架？」至於點樣搵網紅，以及網紅今日紅、過幾日可能唔紅，都令到唔少老闆產生疑慮。Margaret指內地其實都有一班老闆自己捲起衣袖親身做網紅，因為冇一個人比你更熟悉你自己嘅商品、你嘅行業，由你自己去講可能更好、更有說服力，所以貿發局方面都會嘗試介紹一啲訓練課程，大家不妨畀啲信心去嘗試。Margaret又話除咗內地，東盟都係充滿機遇嘅市場。儘管目前礙於疫情，大家難以親身赴當地考察，不過資訊科技可以幫廠商隔空雲遊東盟諸國，進行網上視像參觀，當日後可以親身到東盟發展時，就已經對當地環境同市場有一定了解喇！
葉中賢：港商目光轉投東盟
講起東盟，香港工業總會主席葉中賢（Daniel）就話，依家內地開廠嘅成本愈嚟愈高，唔少港商開始將目光轉投東盟國家。但Daniel就指港廠去東盟唔只開廠咁單一o架，仲可以將本港嘅基建技術、專業服務輸出添。原來Daniel曾經同港府去泰國實地考察過，當時佢哋係打算睇工廠地，但當地人反而係想引入香港嘅污水處理、高鐵同地鐵等技術啊。
廠商會副會長吳國安，就同新任會董王偉樑（Desmond）對談。Desmond從事食品製造及銷售，話過去一年受到疫情影響，不但少咗人出街，消費意欲下降，對生意絕對有影響。不過佢認為有危就有機，轉戰網上巿場，做好網站嘅銷售策略。吳國安就話，廠商會明白大家經營困難，已用3個月時間喺社交平台開拓網銷，希望幫到中小企。
卓妮