政情：焗出席失業援助辯論 羅致光冇晒表情
本港失業率續創新高，政府始終拒絕設立失業援助金，勞工界日前仲公開邀請勞工及福利局局長羅致光出席辯論，但羅似乎側側膊、唔多覺，一直冇回應。之不過要嚟嘅總要嚟，特首尋日就代羅答應出席辯論，作為當事人，羅聞言就即刻擺出一副木無表情、「眼神已死」咁嘅樣添。
原本冇回應 特首「推一把」
事緣勞工顧問委員會勞方代表鄧家彪日前向羅致光發公開信，要求解釋同時仲邀請佢參與公開辯論，但一直冇收到回音。同屬工聯會嘅勞工界議員隨即亦喺立法會口頭質詢環節幫口，話喺立法會未能夠充分討論失業綜援制度嘅缺陷，希望局長出席公開大辯論，之不過羅就例牌官腔回應唔會考慮設立失業援助金，冇回應邀約。
該名議員尋日再接再厲，喺行政長官答問會上直接再提及有關邀請，特首回應話相信羅致光唔會抗拒出席辯論，可以愈辯愈明。大家當然關注當事人嘅反應，點知鏡頭一轉下就見到羅致光望向特首、但目無表情咁。雖則解讀唔到佢嘅反應，不過佢今次點都走唔甩喇。