中環出更：答問大會冇晒火花 議員官員瞓覺撳電話
尋日立法會舉行特首答問大會，自從民主派總辭後，過往喺答問會出現嘅示威同埋火花全部都冇晒。答問會長達一個半鐘，唔知係咪嫌坐定定太悶，不論議員同官員都齊齊撳電話，其中教育局副局長蔡若蓮同埋飲食界議員張宇人，都不約而同咁刪除手機裏面嘅相添，真係識得善用時間喇！
答問大會向來冗長又沉悶，班議員喺會議廳內即使係坐定定，但都好鍾意做低頭族密密咁撳電話解悶。曾經被影到喺答問會期間透過手機玩接龍嘅張宇人，今次就冇再打機，反而係不停刪除手機內嘅相，當中有部分係農曆新年時嘅相，仲有馬會彩票相添，唔知到底係懷舊吓，定係因為電話唔夠空間呢？坐喺公眾席嘅蔡若蓮都係密密撳電話，不時刪吓相，又睇吓書法作品，仲有睇關於中文輸入法嘅嘢添。
馬逢國專注睇戰艦新聞
唔單止做私人事，好多議員都會趁有時間睇吓新聞，緊貼時事。之不過工聯會陸頌雄就似乎好關心足球同娛樂喇，事關佢喺Facebook睇新聞時，係睇吓尋晚嘅英格蘭超級足球聯賽嘅賽果，仲有關於某女星以低胸裝拍攝電視劇嘅新聞。另外體育、演藝、文化及出版界馬逢國，有關戰艦嘅新聞就一度令佢注目，睇完文章描述，仲要打橫部手機睇埋片添！曾經被影到訂購大閘蟹嘅金融服務界議員張華峰，尋日佢間唔中都瞄一瞄部手機以了解股市走勢，事關個市「熊出沒」呀！難怪佢咁關心嘅。
除咗睇吓新聞，以往有唔少議員同官員都被發現喺答問大會期間閉目養神，今次就輪到航運交通界議員易志明，佢瞓醒之後仲捽埋眼添。另外卓妮仲見到金融界議員陳振英同漁農界議員何俊賢，喺答問會期間不停轉筆，唔知係咪怕悶得滯驚瞓着呢？
卓妮