政情：公民講場：追蹤市民冇成效 「安心」搵公僕嚟搞

「安心出行」流動應用程式自去年推出以來，市民反應頗為冷淡，而政府就決定由今日開始，強烈建議公務員及所有公眾進入政府總部或特首辦，都要使用手機掃描「安心出行」嘅二維碼。政府此舉，帳面上無疑係驟增「安心出行」嘅用家，不過公務員工會聯合會總幹事梁籌庭就質疑措施嘅實質成效，因公務員上班當值已經有出入紀錄，再用「安心出行」記錄行蹤屬多此一舉；況且冇人可以保證，公務員收工之後仍繼續使用「安心出行」。政府與其挖空心思搞埋啲表面工夫，不如諗吓點樣將「安心出行」普及化仲好啦。