政情：單身郭芙蓉 突然殺出兩個老公
雲英未嫁嘅葵青區區議員郭芙蓉（Jody），早前喺網絡一段短片當中，大叫元朗區文藝協進會名譽會長莊展銘做老公。議員葉劉淑儀同容海恩尋日喺立法會派飯盒時，就爆出Jody嘅婚訊，然而佢嘅夫婿竟另有其人。點解出現兩個「老公」？莫非Jody換咗畫？
月底同廖添誠拉埋天窗
其實Jody同莊展銘做「兩公婆」，只係演戲啫！同場仲有屯門區議員賴嘉汶負責做旁白。條片主要話打工仔成日出街食飯，接觸嘅人比較多，有機會染上肺炎，若然覺得自己中招，就要及早去社區檢測中心做檢測喇！Jody解釋話大家都好熟嘅，又係後生仔女，所以都冇乜所謂。
至於Jody嘅「真命天子」，係灣仔建設連線成員、新民黨社區主任廖添誠，佢哋月底就拉埋天窗，葉劉話會擔任郭同廖嘅證婚人，婚禮將於今個月尾舉行。礙於疫情，婚宴將以流水式舉行，兩人一枱食打邊爐啊，地點亦都喺廖旗下嘅火鍋店，將會由晏晝開始食到傍晚6點。
相信大家都好好奇，郭同廖兩人係點認識嘅呢？葉劉話，郭同廖係就讀清華大學公共行政碩士課程而認識，因每個周末都要去深圳上堂，透過學習而互相了解，葉太仲講笑話，證明書中自有顏如玉喇！