政情：派利是封唔戴罩 葉子祈明知故犯
本港疫情反覆，政府早前訂立口罩令，要求市民喺公眾地方都需要佩戴口罩，仲提高罰款至5,000元添。西貢區議員葉子祈可能唔驚中招，亦無懼罰款，喺商場派利是封嘅時候唔戴口罩，甚至擺埋上Facebook自己唱通街喎。
犯禁有前科 區會爆發口角
葉子祈喺社交平台上載相片，圖中見到佢派利是封唔戴口罩喎。其後本報記者向佢查詢，問到佢係咪冇戴口罩落街派嘢，佢竟然直接答「係呀！你見到乜嘢就係乜嘢，我post（發布）嘅！」唔知葉係咪唔知會被罰款呢？如果明知故犯，之但係佢呢種大無畏精神，可能都要拎定5,000元出嚟交罰款喇！翻查過往報道，佢都唔係第一次唔戴口罩仲聲大夾惡o架喇。葉喺上年出席區議會會議嘅時候，都多次唔戴口罩，當時有區議員勸佢戴番口罩，佢都唔聽，雙方仲發生口角添！