政情：拒援失業Hea答離地 羅致光自嘲如錄音機
本港失業人數高達24萬，創16年高位，但對於坊間要求設立失業援助金嘅呼聲，政府就充耳不聞。多位議員尋日喺立法會大會上向政府「追數」，要求政府立即設立失業援助金，並交代一直拒絕設立嘅原因。勞工及福利局局長羅致光就繼續無動於衷，並再次指出失業援助金制度需要詳細研究，又話每次議員追問失業援助金嘅時候，佢嘅答案已經接近重複，希望唔會畀外界笑佢係錄音機喇。勞工界議員陸頌雄就好贊同羅唔係錄音機，因為佢話羅好似「Hea做」嘅客戶服務員，一直講「幫緊你！幫緊你！幫緊你！」
會議上多位議員話，農曆新年過後或出現裁員潮同埋結業潮，再次呼籲政府考慮設立失業援助金。其中議員鄭泳舜（Vincent）話，向每位失業人士提供為期半年、每月6,000蚊或9,000蚊嘅失業援助計劃，所涉公帑先得88億元或130億元，遠低於保就業計劃，唔明白點解政府話基於耗用公帑而拒絕推行囉。
死撐綜援已發揮安全網作用
羅致光就開始重複幾個月前嘅答案，話勞工市場受到反覆嘅疫情影響，但政府已經推出一系列措施穩定就業，包括涉款約3,000億元嘅多輪防疫抗疫措施、31,000個臨時就業職位、再培訓課程等，仲「死撐」綜援繼續發揮「安全網」作用。但Vincent就好唔滿意，話羅嘅答案十分可悲，鬧爆局方淨係話自己做咗乜，但冇理市民想你點做。
「係咪等失業率雙位數先出手」
其後多位議員加入戰團，接力炮轟羅致光。勞工界議員潘兆平批評，話局長咁高智商使乜擔心，對失業援助金死都唔肯做！議員陳克勤怒斥局方「幾億幾億咁畀超市，但幾千蚊都唔畀市民！」反問政府係咪等到失業率去到雙位數先推出援助措施呀？勞工界議員陸頌雄都嘲笑羅嘅回答好似「Hea做」嘅客戶服務員，一直講「幫緊你！幫緊你！幫緊你！」
本以為羅致光會反擊，點知佢話自己每次答案已經接近重複，希望唔會被外界指摘為錄音機。只不過，佢對於設立臨時援助金嘅考慮，都係停留喺話失業援助制度要考慮對整體制度嘅影響，仲舉例話美國嘅失業援助制度係失業保險金，要僱主炒咗僱員，員工先拎到筆錢；而英國嘅失業援助制度仲低過香港嘅援助金額。換言之，羅係覺得香港綜援已經足夠。睇嚟羅致光寧願淪為錄音機，都唔會設立失業援助金喇！