中環出更：河套區欠配套 居民恐成開荒牛
本港土地發展規劃，向來存在配套問題。議員林健鋒尋日指政府花費數百億港元發展創新科技及河套區，至今仍停留喺除污及土地平整，佢認為要加快進度，又詢問政府會否建造鐵路支線，連接河套區、落馬洲、羅湖至香園圍，若有應盡快落實，做好交通配套，配合發展。
議員轟發展次序錯晒
另一議員田北辰同樣指出，政府喺新市鎮發展上「次序錯晒」，往往樓宇落成以及入伙，先至發現欠缺足夠交通配套，出現交通運輸滯後多年，直斥「政府究竟發生咩事」。而議員馬逢國就認為公共設施短缺，甚至低於標準，擔心新發展區因規劃不足出現同樣問題，促請政府檢討文娛康樂設施安排。
發展局局長黃偉綸回應話，河套區首批樓宇將於2024年入伙，認為以3至4年時間完成算係唔錯。至於鐵路方面，北環線將於2034完成，若設立一個站經過河套到皇崗，則牽涉北環線支線問題，運房局持開放態度，現未有定案，創科園方面則樂意配合。至於新發展區嘅公共設施規劃，黃就感到樂觀，指政策局會做好規劃工作及向立法會申請撥款，確保「不要市民做開荒牛」。當局會透過賣地計劃，要求私人發展商，協助興建福利設施或公共運輸交匯處等設施並配合入伙時間，盡早啟用。
卓妮