中環出更：黃煥忠：有機菜七成含農藥 應買機構認證產品
有機種植嘅產品售價雖然較高，但亦受到唔少消費者嘅青睞，因為食得安心又放心吖嘛。之但係，目前香港欠缺官方嘅有機產品認證機制，所以坊間亦有人擔心不法商人會魚目混珠，貼個「有機種植」嘅標籤就冒充有機產品賣貴啲，實情假冒有機嘅食品，有可能對身體造成不良影響o架，點解咁講？一齊睇吓香港有機資源中心總監黃煥忠（Jonathan）點講啦！
話說該中心日前上載咗幾段有關有機農作物同產品嘅影片，Jonathan都有客串，原來佢哋中心之前做過一個實測，發現58個聲稱有機種植嘅菜疏樣本入面，有七成都含有農藥；而當中自稱係本地有機菜嘅，亦有成七成四驗出含有農藥，最誇張嘅係有兩個自稱本地有機植物嘅樣本嘅農藥含量更加超出食安標準添，所以Jonathan就建議消費者要買經本地有機機構認證嘅產品，保證唔會畀人搵笨吖嘛。
王詩怡：多地已實施「有機法」
至於同場嘅有機耕種農場場主胡麗麗就話，以前種嘅有機菜經常都有好多蟲咬造成嘅窿窿，以致「賣相唔靚」好難賣得出，但依家嘅有機耕種技術提高咗，佢識得用「間作」同「休耕」嘅方法去種菜，令泥土保持養分，咁啲菜種出嚟就自然又甜又靚又無害喇。胡仲話，有客人同佢講，食咗一段時間有機菜，個人都好似精神咗添。
之不過，喺香港冒認「有機菜」、「有機產品」就好似冇咩後果咁，但該中心助理行政經理王詩怡講，原來依家歐美日韓以及內地等好多地方，都開始實施「有機法」啦，即係話如果有人「無機扮有機」，分分鐘要負上詐欺或偽造虛假文書等刑責，真係唔講唔知啊！
卓妮