政情：港鐵問題多 議員促設鐵路署勿再拖
香港近年唔少新嘅鐵路項目都出現超支，其中沙中線唔單止發生紅磡站工程造假醜聞，舊年又爆出新信號系統有安全隱患而臨陣煞停，接二連三嘅事件都令公眾對港鐵失去信心。政府前晚去信立法會，建議喺運輸及房屋局轄下成立鐵路署，以加強政府對鐵路規劃嘅監管。
兩年前已提出
之不過，身兼鐵路事宜小組委員會主席嘅議員陳恒鑌（Ben）就覺得，鐵路署要等到2022/23財政年先至成立係太遲！
Ben就話，本港急需處理現時對鐵路項目嘅監管問題，明白政府要成立一個新部門係需要啲時間，但就強調社會一直要求成立專責部門處理鐵路事宜嘅訴求，而且政府早喺《2019年施政報告》已經提出有關研究，覺得要等多一年先成立係有啲遲。
Ben又期望未來會成立嘅鐵路署要有清晰嘅職責，唔好出現架床疊屋嘅情況，並且要對港鐵做好監管同提點嘅角色，協助港鐵重建良好嘅管治文化，令到未來鐵路嘅工程價格可以去番一個合理嘅水平。