政情：葉建源「重返議會」 暗寸羅致光離地
官員經常以遊花園、揼波鐘嘅態度回應議員問題，不同政治陣營嘅議員都感到不滿。早前參與總辭嘅前議員葉建源（葉Sir）尋日出席兒童議會會議，佢一開波已經忍唔住表達「重返議會」嘅感受，話自己太耐冇開會，好開心見到一班「議員」，又藉住大讚參與活動嘅小朋友對答出色、做足準備，嚟影射政府高官咁話。
話智商高較難理解他人
兒童議會討論嘅議題，係促請政府增加對特殊教育需要（SEN）兒童嘅協助。葉Sir話見到好多兒童議員對議題有一定認識，反而過去佢同政府官員討論時，就覺得佢哋同件事相隔太遠，即係好離地咁話啊！葉Sir亦借題發揮，話社會普遍認知智障人士屬於SEN，但其實高智商、「IQ 160」都係另一種SEN，即係唔點名話緊IQ 160嘅勞工及福利局局長羅致光，話智商高嘅人通常會難以理解其他人嘅諗法，唔識同人相處。睇嚟葉Sir離開咗議會，仍然對羅致光有好大怨氣，要隔空寸佢喎。