中環出更：邊揸車邊開會 郭偉强累埋黨友
議員郭偉强喺本月14日嘅立法會房屋事務委員會舉行視像會議期間，因為一邊揸車，一邊隔空參與會議而引起社會熱議，指佢涉嫌違反《道路交通條例》，郭最終跪低向公眾道歉，又喺黨友陪同下去警署自首。聽聞郭事後畀其政團內部鬧咗一大餐，為避再次發生同類事件，該政團仲勒令佢哋嘅議員唔可以揸車開會添，費事再招人話柄。
規定要室內坐定定開會
郭嘅黨友兼該政團副會長黃國健（KK）指，發生揸車事件之後，內部已經鬧咗佢，叫佢以後一定唔可以再咁做。KK仲話，唔止郭o架，佢哋仲要求政團內所有有揸開車嘅議員唔可以犯同樣錯誤，講明以後一定要搵個安靜嘅室內地方坐定定開會啊。
其實睇番立法會文件，秘書處早喺本月7日已經發出視像會議指引，其中一條就正正列明「議員、政府官員同其他與會人士宜留喺適當安靜嘅位置參與會議」，話時話郭一早睇吓規矩，咪唔使搞到去警署自首咁醜怪囉。
卓妮