中環出更：30幾年後重拾畫筆 李廣添揚威國際賽
要掌握一門手藝，雖然係年紀愈細就愈好，不過就算人屆中年，只要肯下苦功亦會有一番成就。「畫好香港慈善基金會」主席李廣添（Jackson）自從離開校園，30幾年冇畫過畫，直到6年前先至重拾畫筆，繼而喺前年成立畫廊。鑽研人體畫嘅Jackson曾經遭到朋友潑冷水，話畫人體畫冇用，仲叫佢唔好浪費時間添！之不過佢冇灰心，反而去參加比賽，結果獲得國際獎項，令到當日睇淡佢嘅朋友大跌眼鏡。
儘管學生時代嘅Jackson學過畫插圖，但後來投身社會先後從事廣告以及服裝零售，畫畫嘅技能已經「畀番晒老師」。有一日太太問佢係咪想一世經營時裝店，有所感悟嘅佢就走去學插花，但無奈努力鑽研都只係當女士們嘅助手，於是佢決定重拾畫筆，再闖繪畫嘅世界，又聯同插花班嘅同學黃月梅成立基金會，支持40歲以下年輕人從事藝術發展，目前每個月有2至3堂畫班專畫人體，為免大家抱住色情眼光看待藝術，所以全部都係相熟嘅朋友參與。甚少將作品放上社交平台分享嘅Jackson話，喺香港搵場地做展覽有困難，但有商家朋友捐錢去基金會，用優惠嘅價錢畀朋友做畫展，亦都係成立畫廊嘅理念。
日前Jackson就以基金會嘅名義舉辦畫展，有份參展嘅畫家莊世華自細就喺藥材舖長大，後來繼承家族事業成為一位註冊中醫，但佢自從結識Jackson之後，就喺對方嘅鼓勵之下學習畫畫。莊世華話希望創作一啲同中醫有關嘅作品，不過佢好謙虛咁話自己功力未夠，暫時未有同中醫有關嘅畫作。
尤偉海：要先學習何謂「靚」
同場另一位畫家尤偉海，雖然冇受學正規嘅繪畫訓練，但佢有執教兒童畫班，又喺國際繪畫比賽中獲得獎項，但後來佢覺得有需要自我增值，去浸會大學報讀同繪畫有關嘅導師課程。佢話教小朋友畫畫，畫得好同唔好只係次要，最重要係學習何謂客觀嘅「靚」，之後先至發揮個人風格。
卓妮