政情：姑媽早前確診 鄭泳舜：已康復出院
新冠肺炎疫情嚴重，社會人人自危，一唔小心就可能「中招」，更可能一傳十，十傳百。有指原來議員鄭泳舜（Vincent）姑媽都確診新冠肺炎，仲話Vincent最近都有見過姑媽，不禁令人擔心佢都會中招。大家聽到呢度都嚇一嚇，事關佢呢排都頻頻落區，甚至到封區現場視察，會唔會傳染畀大家呀？
我哋問過Vincent，佢就承認確有其事，不過已經係早幾星期嘅事啦，姑媽已經完全康復，仲出埋院添，冇咩大礙，話多謝大家關心，但因為涉及家人，詳情就唔多講嘞。但Vincent就澄清，之前一段時間都相當忙碌，並冇見過對方，所以唔存在會唔會感染嘅問題，叫大家放心咁話。