政情：許智峯被通緝 開會留空櫈
前議員許智峯早前棄保潛逃，被警方通緝。外界關注佢嘅中西區區議員議席安排，中西區區議會尋日舉行會議，仍然放有佢嘅名牌同座位。
許智峯目前同家人流亡英國，民政事務局早前決定暫停發放許智峯喺12月3日或之後嘅酬金、津貼同開支償還款額，之不過，佢嘅區議員議席仍然得以保留。
若連續4個月冇開會將失議席
根據中西區區議會會議常規，若果區議員連續4個月冇出席會議，同時冇喺限期前得到區議會嘅同意，就會喪失區議員資格。區議會主席鄭麗琼指，並冇收到許智峯嘅請假通知。
另外，各區區議會會議尋日起恢復正常，秘書處會重新提供服務，但鄭麗琼話開會前幾個鐘先接獲秘書處通知，政府人員只會參與兩個鐘會議。秘書處回覆查詢時解釋係防疫安排，鄭麗琼對此感到不滿，反問係咪開咗兩個鐘會，病毒就會出嚟啊？