中環出更：港商疫下需轉型 吳宏斌：勿一本通書睇到老
新冠肺炎疫情至今已經一年，但仲未有消退迹象，喺呢年入面，唔少行業為咗生存焗住唔變唔得，當然商界都唔例外。香港中華廠商聯合會永遠名譽會長吳宏斌尋日喺一個探討「邁向後常態」嘅一個論壇上就話，電商市場係港商喺疫下嘅一大出路，但佢覺得最重要都係疫情可以早日「清零」，咁佢哋商界就自然識得靈活變通o架啦。
所謂山不轉路轉，路不轉人轉，吳宏斌喺論壇就分享咗個傳統珠寶商成功全面轉型做電商嘅例子，話嗰個珠寶商喺轉型後，喺世界各地都有請網紅賣貨，而且反應超好，依家生意仲愈做愈大添！佢就話依家單靠傳統方式跑展覽接單過時啦，疫情下令大家深明「一本通書唔可以睇到老」。
彭耀佳：後生仔要精通兩文三語
同場嘅香港旅遊發展局主席彭耀佳都係咁話，被問到時下後生仔點先可以成功，佢就話「疫情令我哋知道要不斷學習，冇一種技能可以用過世」，另外語言都好重要，精通兩文三語就唔少得喇，或者識得更多其他國家嘅語言就最好，咁樣對後生仔嚟講，相信都向成功行出好重要嘅一步啦！
香港城市大學副校長（發展及對外關係）李國安就話工業界成日都話請唔到人才，因為按佢經驗，好多叻嘅學生畢業後都寧願入大公司做見習行政人員嘅職位，甚至係自己創業，因為佢哋覺得向嗰方面發展，前景會好啲、而機會亦會多啲，佢相信如果政府喺政策上可以扶持工業界多啲，可以有助行業吸納人才。卓妮