政情：何俊賢斥懶理農業萎縮 政府焗市民捱貴豬肉
本港農畜業式微，近年養雞養豬嘅農場數目不斷減少，有議員尋日喺立法會大會上表示，依家全港只剩72個農場，促請政府重視本地農業發展，包括重新發牌同提供配套設施協助禽畜農場遷置等，之但係當局就話，政府現行嘅農業政策仍以確保禽畜健康同環境生物健康為主啊。言下之意，唔知係咪話「香港寸金呎土，搞農業？不了」。
立法會漁農界議員何俊賢（高佬賢）指，全港只有約72個農場。過去5年受到市區發展影響而要遷拆嘅就佔咗6個，呢啲農場實際上佔本地活雞供應百分之百，甚至喺非洲豬瘟肆虐本港期間，本地活豬供應高峰期試過佔全港活豬供應二至三成添。高佬賢強調，當時活豬供應短期內大跌引致豬肉價格飆升，反映增加本地禽畜供應對壓抑物價非常重要，炮轟政府漠視農業發展，多年嚟一直侵蝕農地面積，促請當局重新發牌及開發仲未用嘅2,000多公頃農業用地，以減輕市民嘅物價負擔。
政府指政策以確保生態為主
食物及衞生局局長陳肇始就回應話，受發展影響而要遷拆嘅農戶會有現金補償，但如果佢哋想繼續耕田養豬就要自便啦，指政府依家嘅農業政策都係以確保禽畜同生態健康為主喎。而發展局副局長廖振新就話，如果本港有高科技農業政策，局方第時規劃用地時都會預留農業用途嘅土地嘅。照咁講，依家香港都未有相關政策，即係叫班農民咪發夢喇。