政情：食署批款歎慢板 街市電子支付反應淡
雖然冇人會「嫌錢腥」，但現金又的確係藏污納垢之物，尤其是疫情之下好多市民都會擔心「銀紙播毒」，寧願轉用八達通等非接觸式嘅電子支付，以取代現金交易。儘管香港有唔少舖頭都有採用非接觸式電子支付，但絕大部分街市嘅檔販仍然只接受現金，政府早前就決定資助公眾街市嘅租戶安裝非接觸式付款系統，不過反應就頗為冷淡，僅接獲4,000幾宗申請；而目前亦只係得666宗申請獲批，即是處理咗唔夠兩成申請，認真龜速喇！
立法會財務委員會舊年9月底通過政府提出嘅第3輪「防疫抗疫基金」，其中一項措施就係「於公眾街市推廣非接觸式付款的資助計劃」。
毋須現金往來 減播毒隱憂
食物環境衞生署會向轄下街市參與計劃嘅租戶，每檔劃一提供5,000元嘅資助，以鼓勵佢哋加裝非接觸式付款系統，方便市民買餸時可以毋須用現金往來，減低喺街市傳播病毒嘅風險。
之不過，呢個計劃自推出以嚟一直得唔到租戶熱烈支持。當局喺舊年10月15日開始接受申請，原定喺11月30日就會截止，但由於檔販當時反應並唔積極，食衞署決定將申請期延長至12月21日，最終收到超過3,500宗申請。
政府尋日回應議員邵家輝書面質詢時交代最新數字，話合共接獲4,008宗申請，即佔食環署轄下約12,000個街市租戶中大約三分一。書面答覆中同時透露，當局目前只係批出666宗申請，佔總申請宗數的16.7%，但就強調有關審批申請工作仍然進行中。
死撐冇申請檔販已自行安裝
另一議員李慧琼尋日就透過口頭質詢追問有關問題，批評政府只係吸引到大約三成檔販申請，仲問政府會唔會設立短期職位，搵啲年輕人到公眾街市幫手宣傳，同埋即場為檔主解答問題？政府回應時就話，食環署有做到一系列推廣活動，仲辯稱有部分冇申請資助嘅檔販，其實都係有自行提供非接觸式支付咁話喎。
查實依家疫情仍然嚴峻，唔少市民都打算喺即將來臨嘅新春期間一反傳統，改派「電子利是」減低現金播疫風險。之不過，市民去街市買餸仍然要提心吊膽，甚至要各出奇謀為銀紙消毒，推廣計劃不力嘅食環署署長劉利群真係難辭其咎！