中環出更：黃大仙祠百周年 李耀輝：每個人都應有所信仰
向來香火鼎盛嘅嗇色園黃大仙祠，尋日舉行100周年紀慶開幕典禮。礙於疫情，一眾善信雖只能透過網上直播參與典禮，但黃大仙祠監院李耀輝話，2至3個月後黃大仙祠將會煥然一新，兼且有全玻璃製成嘅財神宮，全港獨有㗎。
李耀輝形容100年「話長唔長話短唔短」，作為一間慈善機構嚟講可以撐到依家，有賴香港市民嘅努力，又話佢哋雖然一直承傳中華文化，但都要展示現代化嘅一面，要話畀大眾知黃大仙祠並唔係啲乜嘢迷信嘅事物。所以黃大仙祠將會開設一個小型嘅展覽，以電子科技展現道教信仰同歷史，同埋一啲黃大仙祠珍藏嘅寶物啊。李又話，其實每一個人都應該有所信仰，之前佢睇過有個調查話全球有九成嘅人都擁有信仰，希望大家可以多多支持嗇色園黃大仙祠。
李家仁：宗教要人常存希望
嗇色園關愛大使、有「小明」之稱嘅兒歌醫生李家仁，都好認同人係應該有所信仰，尤其是當下受疫情困擾，大家都苦不堪言，就更加需要信仰支撐。李家仁話自己雖然係已受洗嘅基督徒，但向來都好欣賞孔子嘅道理、釋迦牟尼嘅智慧同老子嘅哲學，因此儒釋道都係佢嘅信仰內容。佢又話釋迦牟尼並無要求人家當佢係神，因此領略佛學嘅奧妙，係唔會同基督信仰有所牴觸，其實宗教嘅本質，係講求人文關懷，要人常存希望。李家仁又話黃大仙祠儒釋道多元並包，至於嗇色園幾十年來，由初期中醫贈醫施藥，一路擴展至西醫嘅專科服務，體現關懷大眾嘅精神。
民政事務局局長徐英偉都透過網絡視像參與開幕典禮，佢話嗇色園一直為清貧大眾提供醫療服務，更開設16所教育單位，提供公平教育之餘，嗇色園亦有開辦長者中心，關注老友記嘅健康，最近更舉辦各式各樣嘅健康講座，對香港社會貢獻良多，希望嗇色園可以繼續以善行陪伴港人渡過一個又一個難關。
卓妮