政情：屢收性騷擾短訊 陳寶琼未被嚇怕

東區區議員陳寶琼（Kelly）尋日喺社交網站發布打晒格仔嘅淫褻照片！莫非係畀黑客入侵戶口？驚唔驚嚇親一班街坊啊？原來佢上載嘅係來自一位陌生人嘅性騷擾訊息，除咗一張淫褻照片，發送人仲留言話「我是趙生，我愛你，今晚同你去酒店玩」，仲要好大膽咁開價添。

原來Kelly唔係第一次遇到呢啲情況，話上任一年幾，間唔中收到來歷不明嘅性騷擾訊息，都會即刻封鎖對方。但事情一而再、再而三咁發生，Kelly忍唔住發公開聲明，強調自己唔會容忍任何形式嘅性騷擾，唔會沉默，更加唔會退縮，直指咁樣係唔會嚇怕佢㗎。

人名都打錯 網民恥笑

網民都留言支持Kelly公開事件，提醒佢要注意人身安全。仲有網民留意到嗰位匿名人士打錯咗Kelly中文名嘅「琼」字，變咗做「凉」字，忍唔住要恥笑一番。