中環出更：中大學生搞黑暴港獨 何君堯促校方交報告
前年反修例運動逾萬人被拘捕，當中學生佔40%。而香港中文大學（中大）更一度成為示威者同警方對峙嘅「戰場」，事後更被冠上「暴大」污名。身兼立法會教育事務委員會委員嘅議員何君堯，前晚透過社交媒體鬧爆中大管理層不負責任兼失職卸責，當初縱容學生喺校內進行違法示威，但學生被捕後，就割席話係學生嘅問題、責任自負喎。何炮轟豈有此理，仲話將會去信中大，要求佢哋交代學生發生黑暴港獨問題嘅報告，亦會質問校方管理層喺事件當中，有冇人要引咎辭職。
何君堯狠批中大管理層處理學生黑暴與港獨問題嘅手法，唔單止冇阻止佢哋做犯法行為，仲任由學生一而再、再而三咁喺校園播獨，甚至連畢業禮都唔放過，質疑校方暗地裏支持黑暴學生。
質問有冇人須問責下台
何又指，將會去信中大，要求校方就近年嘅校內違法暴力事件提交報告解釋「究竟呢啲事校董會事前知唔知？副校長又知唔知？中大校長段崇智又知唔知？」何仲會質問校方，事件中有冇人要問責下台，佢強調校園問題必須要撥亂反正，待整頓中大之後，就到其他有同樣有問題嘅大學，仲講明「如果大學嘅管理問題搞唔掂，我一蚊都唔批」。
其實除咗何之外，教育事務委員會嘅正、副主席梁美芬同麥美娟都曾先後公開要求段崇智檢視學生問題，當中麥喺舊年更向段發出公開信，呼籲校方展示捍衞核心價值嘅決心，洗脫「暴大」污名。
卓妮