中環出更：疫下事業成泡影 鄭明明：要有不倒翁精神
突如其來嘅新冠肺炎疫情，對於好多營商者而言，可謂百年浩劫，有「美容教母」之稱嘅鄭明明，雖以「付諸一炬」嚟形容自己辛苦創立嘅事業，但佢並冇意興闌珊，反而堅信疫情終會過去，因此依家就要做好準備。而佢之所以能夠保持正能量，係源於爸爸嘅不倒翁玩具。
鄭明明早前應「香港化粧品同業協會」之邀，為該會第二十屆監事會就職典禮致詞。佢憶起當年初到香港，從零開始到後來創辦第一家美髮美容院，繼而再創立屬於自己嘅品牌，當去到稍有成績，去年一場前所未見嘅新冠疫情，令佢嘅心血幾乎化為泡影。面對突如其來嘅打擊，鄭明明想起舊時爸爸嘅辦公室枱上放置好多不倒翁玩具，佢話剎那間，明白到人生中必定會遇到好多困難，跌倒就要趕快企番起身！於是佢就從床上爬起來化好妝，重新走到人群當中。佢又呼籲同業友好，協力鞏固美容界嘅專業形象，為迎接疫後彩虹做好準備。
該會嘅理事長謝景霞（Grace）就指社交活動告吹，以及大家都戴口罩，女士化妝嘅意欲大減，加上內地遊客絕迹，化妝品銷情慘淡，連帶代理商亦陷入困境。
謝景霞促政府酌情支援
Grace又指業界雖積極配合政府嘅防疫政策，然而長期停業，就算舖租方面業主肯予以通融，但最終會坐食山崩。佢認為喺巿民廣泛接種疫苗前，政府應酌情提供支援，大家至更有信心捱過疫情。
監事長兼首席執行顧問何紹忠，就指業界過去雖經歷金融風暴同沙士疫情等風浪，然而面對今次新冠肺炎疫情，特別艱苦。而美容院自去年遭政府屢次勒令停業，至今為時已百多天，老闆、員工除咗經濟收入，心情上亦受到嚴重打擊。佢又話農曆新年過後係經營淡季，若果未能盡早復業的話，業界嘅處境恐怕將更嚴峻。
卓妮