政情：海洋公園老又殘 姚思榮：咪睬佢攤大手板

海洋公園早前公布重生方案嘅內容，係部分園內設施會外判營運，預期暑假開幕嘅水上樂園同保育工作由公園負責，而海洋公園會畀公眾免費入場，但指定設施就逐項收費。政府就話為支援海洋公園集中教育及保育工作、因應公園短時間內轉型所遇到嘅現金短缺，同埋設立新歷險主題區等事項，由2022/23年開始嘅4年內每年提供2.8億元補助，合共11.2億元，另加一筆非經常撥款16.7億元、以及將還款期延長2059年會令政府減少約40億元收入，合共涉款約67.9億港元。

連年虧損 議員斥早該轉型

重生嘅方案好唔好就係未知之數，但旅遊界議員姚思榮尋日就話，海洋公園早就應該轉型，近年面對鄰近地區主題公園嘅競爭，加上海洋公園設施老化、門票價格欠缺競爭優勢嘅問題，導致入場人數停滯不前之餘，仲有下降趨勢，搞到連續數年錄得虧損。佢就希望政府同公園管理層作出新嘅定位、規劃同埋總結，為海洋公園制訂未來長遠發展嘅保育路向喇。

籲外判商先聘用現有員工

另外，姚又強調公園要做好未來發展規劃，千祈唔好又要政府注資，亦都要為2,000名員工做好安排，盡量避免裁員，同埋要求外判商優先聘用現有員工。佢又話，公園應該喺轉型嘅過渡期採取節流措施，釋除市民疑慮，同時以創新思維及深入社區，推動保育工作咁話。

其實立法會財務委員會喺去年都通過一筆54億元嘅撥款，用作資助公園營運一年、償還海洋公園嘅商業貸款，同埋清繳完成海洋公園大樹灣發展項目所需嘅費用。當時唔單止引起社會熱議，就連部分議員都認為畀得一次又有下次。若然海洋公園唔積極改革嘅話，下次係咪要繼續攤大手板，問納稅人攞錢使呢？