中環出更：養家又湊仔 朱振軒：爸爸壓力一代大過一代
面對兒女債，作為一家之主嘅父親，壓力特別大。去年喜得掌上明珠嘅城市青年商會副會長朱振軒（Steven），大嘆做爸爸實在唔容易，事關尚在襁褓嘅囡囡，同即將踏入小學階段嘅大仔，都令人分身不暇，私人時間同社交活動都大減，令佢深感上班當值，反而得享歇息嘅機會。
雖則話目睹子女成長，其喜悅會令人感到更多嘅付出都值得，但係咁並唔代表可以輕視每一位爸爸所面對嘅壓力。Steven指男性因體力較強，以致傳統嘅家庭觀念係父親需外出謀生，肩負經濟重擔，又要時刻自我克制，以作為子女嘅榜樣。而現今社會，身為爸爸嘅男士既要沿襲傳統嘅家庭角色，亦要同太太一齊分擔照顧兒女嘅重責，因此今日嘅年輕爸爸感受到嘅經濟及生活壓力，隨時較上一代要大。Steven又話好多家長都覺得，往日小朋友嘅功課冇咁艱深，亦唔似得今日有咁多興趣班。正所謂壓力人人有，程度各不同，作為全男班嘅城市青年商會，今年嘅社會發展工作計劃「爸爸咪爆煲」將致力顧及育有下一代嘅活動參與者，喚起大眾對爸爸嘅關懷，其中會以問卷形式，讓子女18歲或以下嘅「父親」得悉自己承受嘅壓力程度，從而及早作出應對措施。
王師堯父親要身兼母職
該會嘅會長王師堯因年少喪母，對於爸爸多年來身兼母職，佩服不已。由於單親家庭嘅現象愈趨普遍，「父親」嘅角色亦未必係男性嘅專屬，故此「爸爸咪爆煲」嘅活動對象，可以係扮演着父親角色嘅任何家庭成員。
除咗關注爸爸嘅壓力，城市青年商會嘅另一項工作計劃，係舉辦首屆傑出大專生選舉，負責項目嘅副會長黃俊文以及籌委會主席李俊文都留意到老一輩嘅人，近年對青年人嘅評價較為負面，其實當今嘅青年人生於網絡世代，思維都好敏銳，而社會亦應給予青年人更多機會，而佢哋就希望透過選出十位傑出大專生，發揮青年人優秀嘅潛質。卓妮