唔少年輕人在學期間，都會趁假期參加實習計劃，以吸取多啲工作經驗，將來畢業搵工都易啲咁話。城市大學電機工程學系日前同6間企業，就建成聯合實驗室舉行網上開幕禮。城市大學校長郭位都好認同學生要有實習嘅經驗，咁先可以掌握到市場嘅動態，實戰嘅經驗喺學校就咁上堂學唔到o架！

郭位話曾經問過一班同事，佢哋課堂上傳授嘅知識，學生可唔可以喺學校外面都自己學到？教授們聽到都一片沉默，唔知點樣回答。郭話正正因為咁，希望今次透過同企業嘅合作，可以為學生爭取到一啲學校以外嘅知識同經驗。另外郭位又話，學生參與實習除咗幫到自己將來嘅事業，更加要透過電子科技幫到社會啊。

科技要惠及社會大眾，各界嘅合作好重要。電訊公司首席技術官鄒金根指，佢哋希望透過5G網絡，協助企業溝通同處理資訊，但單靠佢哋自己嘅力量係唔夠嘅，仲要同其他行業一齊合作。

講起合作，城大近年發展獸醫課程，而某科技公司嘅執行董事兼首席技術官吳文卓（Alfred）就分享咗舊年佢哋公司同城大一位實習生嘅合作，一齊研發咗一套寵物樣貌辨識嘅系統。平時大家見到幾隻同品種嘅寵物，可能會分唔到邊隻打邊隻，但呢個系統就可以透過動物嘅五官，辨別出要特定尋找嘅動物。

某跨國電腦科技公司嘅港澳區總經理陳珊珊就話，疫情持續一年，改變咗大家嘅工作同生活習慣，例如有餐廳可以透過網上雲端平台做外賣生意；市民擔心染疫唔想去醫院，又可以上網預約；學校停課，學生都可以網上交功課，停課不停學。陳珊珊話，雖然2020年大家的確過得好辛苦，但不得不講科技上亦都有好多突破同收穫。

卓妮