政府打算喺油麻地、佐敦同深水埗等人煙密集嘅地區實施小區檢測，以圖切斷社區傳播鏈，然而要達到效果，劃為小區內嘅人口恐怕難以隨意進出，政府亦都明白到人流受阻，勢必波及到商戶嘅生意，尋日食物及衞生局副局長徐德義就話，由於做檢測嘅時間相對較短，受影響商戶唔會得到援助，然後就補多句唔好意思。其實疫情下做生意已經好艱難，人流受阻就更加雪上加霜。徐德義講句唔好意思，莫非就可以幫小商戶應付燈油火蠟舖租人工等支出？
