政情：許智峯議辦停運 死撐有天會返港
目前被警方通緝、流亡英國嘅前民主黨立法會議員及中西區區議員許智峯，尋日喺社交平台發文，指政府提早停發其區議員辦事處嘅營運開支，惟有宣布其中環區議員辦事處終止運作。許表示自己身處海外，按現行法例中環選區應舉行補選，期望佢嘅繼任人能實幹為社區做事，係一個講真話同忠誠於理念嘅人，呼籲市民一齊監察繼任人嘅工作。
許智峯話離開立法會嘅崗位，係因為民選議員喺立法機關內已失去制衡角色；而離開區議會，則相信為香港發聲是比做區議員更重要嘅使命，指《港區國安法》實施後香港已容不下任何反對政權嘅立場，故有必要擴展至國際社會。許最後又同街坊暫別，稱將來一定會返嚟重聚，並以「你們的區議員」為署名作結。
鬧政府懶理訴求
在區政方面，許批評過去10年來，無論自己用溫和或激進嘅方式表達訴求，政府依然故我，「闊佬懶理」。佢認為要換上一個向市民及議會問責嘅政府，民生政策至可以有實質改變。佢又指依家自己喺新崗位上，投入「換走政府」嘅工作，例如喺國際上建立盟友，認為咁至係區政同民生工作嘅終極出路。