疫下經濟跌落谷底，政府喺舊年年底為工商舖撤辣，即買方唔使畀雙倍印花稅，但係政府做啲唔做啲，堅拒住宅物業撤辣，好多議員直指喺疫下已經唔少市民失業，可能有啲市民要賣樓套現，鬧爆政府不知民間疾苦。話時話，班高官坐喺辦公室閉門造車就叻，邊樣政策係合乎民意o架，依家市民陷於水深火熱之中，財經事務及庫務局局長許正宇早前已拒絕市民提前攞強積金自救，佢仲死攬辣招唔放，係咪見死不救呀？
