中環出更：疏散疫廈安排混亂 港府認衰
政府舊年修訂《促進種族平等行政指引》，包括新增關於語言服務指南，讓本港人士不論種族都可享有平等機會獲得公共服務。有議員尋日喺立法會政制事務委員會會議上批評，住喺油麻地新填地街嘅少數族裔人士因語言不通，未能了解政府強制檢測安排，導致疏散時出現混亂，質疑政府修訂指引只係「紙上談兵」。政制及內地事務局副局長陳帥夫亦認衰，仲話有關部門正檢視係咪會「一吹雞就到」喎。
議員葉劉淑儀話依家最需要協助嘅係低收入嘅少數族裔人士，淨係睇新填地街疏散情況就知指引係咪有效，質疑部門冇跟指引作適切語言傳譯支援。另一議員鄭泳舜亦話，雖然民政事務處已派大使到區內進行游說，但佢認為依家情況依然混亂，叫衞生署同其他部門作更多支援，同埋廣泛宣傳有關安排。
言語不通 未及時安排翻譯員
畀議員係咁噴，陳帥夫話喺疫情爆發時有部門需要通知住戶疏散，但有關通告只得英文，佢承認工作上仍有不足，強調文書方面工作可簡單解決，但有時情況趕急，未能及時安排翻譯人員，有關部門正檢視是否「一吹雞就到」。又話局方尋日亦同衞生署了解安排傳譯工作上係咪有困難，署方亦表明會作檢討。
另外，會上有議員要求局方積極執行消除種族歧視問題。議員陸頌雄形容現時打擊種族歧視嘅「中傷法」如無牙老虎，又批評平機會過去冇積極處理投訴，促請政府主動責成平機會調查受社會關注嘅案件，否則平機會有如「獨立王國」，自己決定係咪處理投訴。陳帥夫承認喺打擊種族中傷行為方面冇案例，局方需要檢視係咪法例有不足或執行有問題，又話會同平機會反映。
卓妮